Í fótspor Pheidippidesar

Pistill

2008-05-21T02:50:00.000-07:00

Það verður æ lengra milli pistla hér sem skrifast alfarið á pennaleti. Hér hefur vorið smám saman tekið völdin og fyrstu sumardagar hafa liðið. Við höfum notað okkur veðurblíðuna og farið tvívegis í Arboreet sem er trjásafn innfæddra með stígum og vatni og lækjum fullum af froskum og skordýrum. Sáum í fyrra skiptið íkorna skoppa í trjánum, Eðlu sem bakaði sig í sólinni, frosk, drekaflugulirfu og svokallaðan Stålorm sem er raunverulega fótalaus eðla og þannig ormsnafninu ofaukið. Í seinni ferðinni upplifðum við að heyra klið af fótataki skógarmaura í mauraþúfu.

Það var hægt að sjá mun á gróandanum þessa viku sem leið á milli ferða hjá okkur. Meðal blóma var þessi Lilja sem lyktaði eins og hræ. Náttúran hefur sínar aðferðir við aðföngin!

Afrek fjölskuldumeðlima liggja eikum hjá Írisi sem hefur náð að missa sína fyrstu tönn og er byrjuð að hjóla hjálpardekkjalaus, ekki slæmur árangur það.

Jú svo kom 17. mai og fór. Það var gott!

Prik framtíðarinnar

2008-04-09T09:18:00.000-07:00

Frýjuorð og hvatningar

2008-03-12T06:10:00.000-07:00

Sökum hvatningar frá Arnari og efasemda frá mömmu læt ég þetta myndbrot fylgja með. Ekki alveg nýtt en sýnir (kannski ekki augljóslega) tignarlegan, nánast ljóðrænan Þelamerkur stílinn sem hefur af sumum verið jafnað líkt við líkamlegar fínbókmenntir eða "corporal poesí".

Vetur í Fjallasal

2008-03-09T13:44:00.001-07:00

Eins og ég sagði í síðasta innleggi var á döfinni að fara í skíðaferð og Röldal áfangastaðurinn. Ég var líka búinn að lofa innleggi eftir ferðina sem kemur loksins nú! Betra seint en aldrei.

Hér á vesturströnd Noregs er ekki vetur, heldur stöðugt haust og við höfum verið að upplifa lengsta haust i manna minnum hér. Að vísu voru október og nóvember sæmilegir, ef ég man rétt en svo hefur verið rigning, rigning og aftur... jú, þú átt kollgátuna, rigning.

Ég fæ, eins og margir vita, regluleg frí í vaktarúllunni minni sem koma til af því hvað ég vinn mikiði af löngum vöktum (úúúú!!) og þetta frí bar nú upp í vikunni fyrir vetrarfrí og tilviljun réði því svo að Þóra átti líka marga daga lausa akkúrat þessa viku. Þessvegna tekin sá póll í hæðina að fara í skíðafrí. Í lífi okkar hefur auk veikinda barnanna, mögulegra barnapía (sem hafa jafnvel gert sér upp heilahimnubólgu til að losna undan barnagæslu) verið einn hlutur sem hefur sett strik í reikninginn og það er bíllinn! Nú bar svo við að stuttu fyrir skíðaferðina fór hann að láta með ólíkindum og verkstæðisgreiningin var, eina ferðina enn, ónýtur gírkassi! Jæja, þegar búið var að klassa gripinn upp með enn einum nýjum gírkassa var ekki til setunnar boðið, lagt í hann að kveldi þess 12. febrúar og komið að kveldi í vetrarríkið í Röldal, sem er fjöllum krýndur smábær inni í landi norðan Stavangurs. Dagurinn eftir fór í að koma krökkunum fyrst upp i fjallið í stólalyftunni og svo grenjandi og kvartandi úr stólalyftunni, niður í barnabrekkuna sem er svo óheppilega staðsett sem mitt í fjallinu. Þetta dugði næstum til andlegrar vanheilsu fyrir okkur foreldrana og varanlegrar óbeitar á skíðaíþróttinni fyrir krakkana. Hafðist þó fyrir rest og tekið snemma til við nestið. Sá dagur leið svo við skíðarennsli hjá mis-áhugasömum rennslis unnendum, einkum var það Ari sem sökum ótta við að lenda í stjórnlausu niðurrennsli niður aðal brekkuna beindi för sinni gegnum karga og "bratta" í barnabrekkunni og hafði þar af leiðandi takamarkað gagn og enn minna gaman af deginum og það eina sem sló á hræðsluna við "hyldýpið" niðureftir var hræðslan við skapofsa karlkynsuppalandans á heimilinu. Þau systikin fengu svo far með snjósleða niður í skála að degi loknum þeim til talsverðrar gleði. Heimilisfaðirinn elti svo spúsu sína með skíði barnanna í bakpoka á fjallaskíðum sínum og skíðaði niður brattann af svo mikilli kyngi og reisn að Írisi varð á orði: "Hann er eins og krakki!" og þá sennilega vísað til svokallaðrar "Þjóhnappa-Þelamerkur sveiflu" sem notuð var sér til framdráttar (hér verður ímyndunarafl lesanda að fylla upp í lýsinguna).

Næstu tveir dagar voru svo tíðindalausir á afar jákvæðan hátt, krakkarnir efldust í skíðamennskunni daginn eftir og um kvöldið farið út og gerð atlaga að smíð igloos með hálfum sigri. alla dagana var rjómablíða, með sól og stilltu og köldu veðri. Aveg stórkostleg tilbreyting frá gráviðri liðinna vikna. Á föstudeginum keyrðum við svo heim seinnipartinn eftir að ég hafði fengið leyfi til að renna mér aðeins og snurfusa Þelasvinginn betur, þótt enn hafi nokkuð uppá vantað. Heimferðin var tíðindalaus og ekið í skjóli fjalla, dala og fjarða í ljómablíðu. Í heildina sérlega skemmtileg ferð og vítamínsprauta í sálarlífið.

Stór dagur í dag!!!!!!

2008-02-11T12:56:00.000-08:00

Á morgun er stefnan sett á Röldal sem er skíðaparadís Vesturnoregs Með svo traustum snjóskilyrðum að annað verður ekki fært til jafnaðar. Ég ætla að muna að taka myndavélina með og setja myndir hér á netið að ferð lokinni. Það verður spennandi! Alltaf eitthvað spennandi að geras hérna! Úff!

Bíódagar

2008-02-10T05:55:00.000-08:00

Það er altaf hægt að koma manni á óvart. Sáum sniðuga norska bíómynd í gær sem hét Den Brysomme Mannen. Fjallar um mann sem kemur með rútu (gamalli Sæmundar rútu mas.) og er útveguð vinna við bókhald í fyrirtæki í stórborg. Plottið snýst svo um að menn virðast vera alveg sneyddir tilfinningum, allt snýst um fín sófasett og innanhúsarkitektúr og ytri gæðum. Allt er hægt að laga sbr. þegar hetjan okkar klippir af sér vísifingur í pappírsklippum og rankar við sér í bíl með umbúðir um hendina og vísifingurinn snyrtilega skeyttan á sinn stað. Á sama tíma vantar alla tilfinningu, bragð, upplifun í hversdaginn. Engin gleði eða sorg, vellíðan eða sársauki. Mynd sem vekur mann til umhugsunar þótt ég hafi ekki komist að neinni niðurstöðu, enda langt síðan ég hef komist að niðurstöðu um eitthvað síðast. Mjög fyndin mynd á köflum, samt ekki Lasse Åberg fyndin en ég get samt alveg mælt með henni.

Annars svosem ekki margt að frétta...

Hokkí

2008-01-23T04:58:00.000-08:00

Krakkarnir komnir á fullt skrið í hokkíinu og bæði farin að renna eins og hetjur. Maður sér dagamun á þeim, aldeilis gaman það! Og það sem ekki skemmir fyrir er að þau virðast bæði hafa mjög gaman að þessu. Annars sá Íris listtdansstelpurnar æfa sig fyrir síðasta hokkítíma og starði opinmynt með stjörnur í augum. Þetta ætlaði hún sko að læra!

Hver dagur öðrum ólíkur

2008-01-20T04:03:00.000-08:00

Jæja, sunnudagurinn er kominn og fjölskyldan sundruð. Þe. Ari fékk að gista hjá bekkjarfélaga sínum og vini honum Espen í nótt. Sofnuðu seint og vöknuðu snemma samkvæmt Evu mömmu hans.

Ég búinn að hlaupa við Stokkavatnið í dag og Íris og Þóra búnar í tölugöngu þar sem öll númer frá 1 og upp í nokkurhundruð voru talin. Svo er planlagt matarboð með Hrafi, Ástu og þeirra gemlingum seinnipartinn eftir hressingargöngu gömlu mannanna kringum títtnefnt Stokkavat. Ja nú gustar heldur en ekki um Ulkrækinga!!

Langur dagur maður!

2008-01-14T12:30:00.000-08:00

Byrjað snemma kl. 6:30 í morgun með rúmrisu og dögurð. Svo vinna til 17:30. Svo sund með Írisi kl. 18 og Ara kl. 19:30. svo heim og borðað. Þessir krakkar eru að verða sannir garpar. Gaman að því.

Rok og regn, blautur í gegn

2008-01-09T09:50:00.000-08:00

Kominn inn úr stuttu hlaupi. Ekki var það vont. Vandi heimsins tekinn taki oki lyft af hump. Hreyfðir limir gefa gleði þegar lyft er rump. Gott er að hlaupa þetta viss líka hann Forest Gump.

Ich bin einer Marathon laufer, ich mag das Marathon laufen!

2008-01-06T13:08:00.001-08:00

Hlaupaárið 2008 er hafið. Ég fór fyrsta hlaupatúrinn minn í langan tíma, misti úr einn mánuð. Og að vanda er upphafið stirt og slappt en hafðist. Fór á nýjar slóðir í dag og hljóp hring um Mosvatn sem er lítill hringur og jafnhár. Ekki mikils krafist af manni þar og það hafðist ágætlega, allavega kominn af stað!

Annars á Hjörvar afmæli í dag, ég slæ á þráðinn til hans nú þegar!

Gleðilegt nýtt ár

2008-01-01T00:42:00.000-08:00

Jæja! þá er hafið nýtt ár, eina ferðina enn. Hvað skyldi þetta árið bera í skauti sér? það getur verið erfitt að sjá fyrir. Og eins og glöggir hafa áttað sig á hefur förin til Marathon reynst mér seinfarin eins og er, raunar er ég ekki mikið nær þeim áfanga mínum nú en fyrir ári síðan en það markmið stendur þó enn!

Var að koma af vaktinni sem var svo róleg að ég svaf yfir mig á morgunfundinn og kom hálf sofandi með stýrurnar í augunum inn á vaktherbergi. Fæðingamet var slegið aftur í fyrra með einni fæðingu meira en árinu áður. Spilaði svo mikið á gítarinn að ég er kominn með sigg á fingurgómana. Fékk tilboð um gigg á fæðingadeildinni allar næstu næturvaktir. Ekki ónýtt það!

Svissen frýling únd noijar

2007-12-27T04:08:00.000-08:00

3. jóladagur. Hér hefur jólaheimsókn foreldranna gengið yfir, aðfangadegi fagnað með viðeigandi ofáti og jólagjafasundrun. Svo vaknar maður upp við timburmenn ofneyslu síðastliðinna daga og býr sig undir næstu lotu(græðgi). Þó vill nú svo vel til að ég er að vinna gamlárskvöld/nýársnótt.

Svona á jóladögunum gefst manni tími til að "reflektera" síðastliðið ár með vissum söknuði og votti af trega. Af einskonar melankólískri introspektívri sjálfsvorkun, um allt sem maður hefði átt að gera mikið betur en maður gerði en gerði ekki en mun sennilega gera öðruvísi næst en samt sennilega ekki......!

Árið má sennilega taka saman í orðum Lawrence Durrell sem sagði: " Vinna er blessun dulbúin sem bölvun". Samkvæmt þessum orðum höfum við hjónin notið blessunar þessi jólin.

Og orð Ernst von Feuchtersleben eru tvímælalaust mottó næsta árs: " Að breyta sjálfum sér er engum auðið - en að bæta sig, það geta allir.

Gleðileg jól allir saman, og takk fyrir mig!

Allir dagar fyrstir af restlifuðu

2007-12-16T10:01:00.001-08:00

Hér líða dagarnir hver af öðrum og á niðurteljaranum sem sýndi rúmlega 900 daga þegar við fluttum hingað eru nú aðeins 27 eftir. Svona hefur þetta potast dag fyrir dag á þess að maður hafi tekið eftir. Heyrði haft eftir einhverju norsku skáldi: "Allir þessir dagar sem komu og liðu, ekki vissi ég að það væri lífið!" Skemmtilega að orði komist.

Annars vil ég tileinka þennan pistil Vali félaga mínum. Hann er alkóhólisti. Hann er líka góður drengur sem mér þykir mikið til koma.

Ein af höfuðsyndunum

2007-12-12T01:44:00.001-08:00

Hér hefur lítið verðið skrifað upp á síðkastið. Fyrir því er ein ástæða, ekki að tími hafi verið af skornum skammti. Ég er búinn að vera í fríi í 1 1/2 viku. Nei ástæðan er einföld og er helst sú að ég einmitt er í fríi, held að þeim minna sem maður hefur að gera þeim minna gerir maður. Og svo er líka eins og maður geti sofið allan sólarhringinn við þessar aðstæður og á þessum árstíma. Erettekki mErkileggt!

En tíminn líður ekki!

2007-12-07T07:27:00.000-08:00

Og aldrei koma jóólin! Eins og sungið var hér forðum. Hér líður tíminn samt alveg eðlilega fyrir sig. Smám saman pjakkast aðstaðan í kjallaranum og stefnt að því að setja eitthvert gólfefni til bráðabirgða svo það verði nothæft.

Íslandsjólapakkarnir fóru í póstinn í fyrradag ásamt umsókn um sérfræðingsleyfi svo nú veður á súðum hjá útlegðarfjölskyldunni! Í gær var líka haldin aðventuhátíð bæði hjá Írisi í leikskólanum og hjá Ara í skólanum. Og eins og vant er gleymdist myndavélin heima. Þið verðið bara að ímynda ykkur hvernig þetta var.

Já!... Fuglarnir og sólin?...

Nú hefst vetrarfríið

2007-11-28T23:43:00.000-08:00

Fékk óvænt frí í desember vegna ófullkomins frís í sumar, þe. ég átti ennþá viku til góða. Svo nú er tekið forskot á sæluna, farið í næstu bæjarfélög og "sjoppað" ef svo má að orði komast. Það kostar að vísu ferjuferðalag en gæti orðið vel þess virði!

Hef ekki komist að hlaupa síðastliðna daga sökum anna, hélt "lærðan fyrirlestu" um legsig sem mér finnst ýkt spennandi, í alvöru! Sumir græða á tá og fingri en þetta verður mitt gnægtarhorn og af nógu að taka, það er sko alveg á hreinu.

Lokaspretturinn

2007-11-26T12:40:00.000-08:00

Þá er það síðasta eyktin fyrir 2 vikna frí í desember. Var með Ara í sundi í kvöld, honum fer heldur fram en gleymir sér gjarnan í vitleysisgangi ef maður hefur ekki hemil á honum. Hann er þó farinn að reyna að anda til hliðar þegar hann vandar sig og skriðsundið er heldur beinna en það var.

Þessi vika fer í ýmsa atburði skemmtilega, ætla mér að hlaupa í þágu mannkyns og ýmislegt fleira sér til gamans gert. Hvað síðar gerist mun framtíðin ein sýna en eitt er víst: Jólagjafirnar eru flestar komnar í höfn og tilbúnar til sendingar. Ekki ráð nema í tíma tekið.

Vont en venst vonandi

2007-11-20T04:01:00.000-08:00

Þessa dagana er hlaupið með harmkvælum. Verkir í kálfum og sköflungum, þungur á mér og allt erfitt! Hef verið að reyna að kenna einhverju öðru um en að ég sé ca. 5 kg. þyngri núna en þegar ég byrjaði að hlaupa síðasta haust, svosem eins og að innleggin í skóna séu orðin gömul; að skórnir séu nýir; osfrv. Það má grípa í hálmstrá, en ekki víst að það hjálpi.

Skráning á hinu óumflýjanlega

2007-11-17T14:44:00.000-08:00

Þe. hversdeginum. Vaknaði, borðaði morgunmat, drakk kaffi, tók til inni hjá Írisi, borðaði hádegismat, drakk meira kaffi, fór í verslunarferð í nýja mollið hérna sem er eins og Smáralind, borðaði þar kvöldmat og drakk enn meira kaffi, heim að horfa á Wayne´s World með familíunni, út að hlaupa við Stokkavatnið og svo sit ég hér nú. Veðrið er gott, logn og 9°C. Tungl veður í skýjum. Varúlfaveður. Sá samt engan slíkan við vatnið. Sem betur fer.

Hef ákveðið að tíunda ekki klósettferðirnar...

Hausthæðirnar lagstar að

2007-11-13T13:31:00.000-08:00

Sem ég segi, ekkert er nýtt undir sólinni. Ekki heldur hjá mér.

Djúpi þanki dagsins er: Gusa þeir mest sem grynst vaða? Bylur hæst í tómri tunnu? Hvenær kemur hlé? Nokkuð títt af Jóni frá Felli? Enn reimt á Kili?

4 km í stilltu frosti við Stokkavatn. Himininn heiður og tæri. Ég er í svaka stuði.

Save it for a rainy day?

2007-11-11T11:46:00.000-08:00

Já það má kanski segja, allavega voru kílómetrarnir 8 lagðir að velli í myrkri, rigningu og roki í dag. Og þeir voru teknir hægt, og með góðri upphitun á undan og teygjum á eftir. Þetta er sennilega tákn þess að maður sé að verða gamall, maður þolir minna af hreyfingu en áður og er lengur að koma sér í form, þótt ég eigi sennilega alltaf eftir að kenna Sverri hænsnabónda Kiernan um að hafa smitað mig af beinhimnubólgu hér um árið. Eða kannski frekar að hann gaf verkjunum sem ég var alltaf með í sköflungunum nafn. Já, það er nær sanni. Hef einsettmér að halda þessum vegalengdum sem ég hef verið að hlaupa síðastliðnar 2 vikur, nokkrum vikum lengur áður en ég fer að bæta við, svona rétt til að venja skrokkinn við.

Annars er helgin að verða liðin og ég sé fram á venjulega vinnuviku framundan og svo langþráð helgarleyfi. Og þá verður eitthvað skemmtilegt gert, eins og vanalega (ahemm!).

Vinnuhelgi

2007-11-10T07:57:00.000-08:00

Ég er að vinna um helgina eins og raunar allar helgar í nóvember nema eina. Og Það er saga lífs okkar að vinna alla daga og allar helgar. Það er samt alveg hund fúlt. Eða þannig. Ég fæ svo að öllum líkindum sérfræðingsstöðu á kvennadeildinni í byrjun næsta árs eða fra fyrsta janúar svo nú er maður alveg orðinn mikill karl. Eða þannig sko.

Desea el día de paga vivo!

Hljóp í dag 4 km. í stilltu hausti, gekk vel. Ég sé fyrir mér að með þessu áframhaldi geti ég hlaupið í einhverskonar hlaupi næsta sumar, það væri allavega gaman.

Stutt andartak í löngu lífi

2007-11-04T14:28:00.000-08:00

Helgarvakt. Rólegt í dag svo ég hafði meira að segja smá tíma fyrir skjólstæðingana, þá sem voru inniliggjandi! Sat eina stundina við rúmgafl konu sem kúgaðist og ældi og hljóp á klósettið þess á milli algerlega buguð. Þá næstu við sama rúmgafl þar sem hún ræðir, með eldmóð, um hugsunarleysið og einstrengingsskapinn í kerfinu þar sem ekkert pláss er fyrir einstaklingsmiðaða meðferð og nú er kominn þessi neisti sem maður sér hjá þeim sem berst áfram staðráðinn í að ná öllu útúr lífinu sem það getur. Að standa svona álengdar og fylgjast með þessum hamförum, það er sérstakt.

Af mammonskum, og öðrum pælingum

2007-10-31T15:24:00.001-07:00

Hef komist að því að mig bráðvantar nýja tölvu. Og ekki bara einhverja, heldur iMac 24" kvikindi með stórum hörðum og fullt af fínum fítusum. Og það sem er kannski mikilvægast, hún er glÆný. Já svona fer það þegar maður fær dót í afmælisgjöf. Ævinlega vill mikill meira!

Annars eru þetta ekki sérlega hugsandi pælingar. Verð að reyna betur.... Jú hér kemur ein góð pæling sem Mér datt allt í einu í hug. Hver er tilgangur lífsins? (Kann einhvert ykkar svar við því? Allar tillögur eru vel þegnar, væri algerlega ti í að skeggræða það hér á þessum vettvangi). Hafa veraldleg gæði eitthvað með þetta markmið að gera, þe er annað háð hinu eða áhrifavaldur á það? Endilega setjið niður ykkar vangaveltur um þetta en munið að það sem skrifað er á "Vefinn" á eftir að standa þar um ókomna tíð (VÁ! var reyndar ekki búinn að spá í þann vinkil áður!)